ᑲᓇᑕᒥ ᐅᖃᖃᒌᕝᕕᒃ

AI ᐊᓯᔾᔨᖅᐸᓪᓕᐊᑎᑦᑎᓂᖓᓄᑦ ᐊᒻᒪᓗ ᐅᖃᓕᒫᕐᓂᕐᒧᑦ: ᐱᕕᖃᕈᑎᒋᔭᐅᕚ ᐅᕝᕙᓘᓐᓃᑦ ᐅᓗᕆᐊᓇᖅᑐᒨᖅᑎᑦᑎᒍᓐᓇᖅᐹ?

ᐃᓕᒌᑦ ᐅᖃᓕᒫᕐᓂᕐᒧᑦ (ᑕᐃᔭᐅᕙᓚᐅᖅᓯᒪᔪᖅ ᕗᕋᓐᑎᐅᕐ ᓯᓚᑦᑐᓴᕐᕕᖓ)

ᐅᖃᓕᒫᕐᓂᖅ ᐊᒻᒪᓗ ᓈᓴᐅᓯᕆᓂᖅ ᐊᑦᑐᐃᓂᖃᓪᓚᑦᑖᓲᖅ ᐃᓅᓯᓕᒫᑦᑎᐊᑎᓐᓂᒃ. ᐅᖃᓕᒫᕈᓐᓇᕐᓂᖅ, ᑎᑎᕋᕈᓐᓇᕐᓂᖅ, ᐊᒻᒪᓗ ᓈᓴᐅᓯᕆᒍᓐᓇᕐᓂᖅ ᐊᑦᑐᐃᓂᖃᓪᓚᕆᑦᑐᖅ ᖃᓄᐃᑦᑕᐃᓕᒪᒍᓐᓇᕐᓂᑦᑎᓐᓂᒃ. ᑭᓯᐊᓂᓕ ᐃᓄᐃᑦ ᖃᑦᑎᓂᑦ ᐅᑭᐅᖃᕋᓗᐊᕈᑎᑦ ᐊᕝᕕᐊᕈᑎᖃᓲᑦ ᐱᐅᓯᕚᓪᓕᖅᑎᑦᑎᓇᓱᐊᕐᓗᑎᑦ ᐅᖃᓕᒫᕈᓐᓇᕐᓂᖏᓐᓂᑦ ᐊᒻᒪᓗ ᓈᓴᐅᓯᕆᔪᓐᓇᕐᓂᖏᖕᓂᒃ. 1899-ᒥᓂᑦ, ᐃᓕᒌᑦ ᐅᖃᓕᒫᕈᓐᓇᕐᓂᕐᒧᑦ ᑲᓇᑕᒥ ᐅᖃᓕᒫᕆᐅᖅᓴᓂᕐᒧᑦ ᑲᑐᔾᔨᖃᑎᒌᓪᓗᐊᑕᕆᔭᐅᓯᒪᕗᖅ. ᐃᖅᑲᓇᐃᔭᖃᑎᖃᓲᖑᕗᒍᑦ ᐊᑭᓕᖅᓱᖅᑕᐅᙱᑦᑐᓂᑦ ᐱᓕᕆᔨᓂᒃ ᐊᒻᒪᓗ ᓄᓇᓕᓐᓂ ᑲᑐᔾᔨᔨᓂᒃ ᐱᓕᕆᖃᑎᖃᖅᐸᑦᑐᑕ ᐃᑲᔪᖅᑐᐃᓪᓗᑕ ᐅᖃᓕᒫᕐᓂᕐᒥᒃ, ᑎᑎᕋᕐᓂᕐᒥᒃ, ᐊᒻᒪᓗ ᓈᓴᐅᓯᕆᓂᕐᒧᑦ ᓄᑕᖅᑲᓄᑦ, ᒪᒃᑯᑦᑐᓄᑦ, ᐊᒻᒪᓗ ᐃᓐᓇᕐᓄᑦ.

ᖃᕋᓴᐅᔭᒃᑯᑦ ᐅᖃᓕᒫᕐᓂᖅ ᓄᑖᐸᓘᒻᒪᑦ ᓱᓕ ᐅᖃᓕᒫᕈᑎᒋᔭᒃᓴᐅᓪᓗᓂ; ᖃᕋᓴᐅᔭᖅ ᑐᑭᓯᒍᓐᓇᖅᑐᖅ ᐊᒻᒪᓗ ᐊᑐᕐᓗᓂ ᖃᕋᓴᐅᔭᕐᒥ ᐅᖃᓕᒫᕈᑎᒋᔭᐅᓗᓂ. ᑲᓇᑕᒥ, ᐊᕕᒃᓯᒪᐅᖅᑐᑦ ᐃᓄᐃᑦ ᐃᓱᒪᒋᔭᖏᑦ ᖃᕋᓴᐅᔭᕐᒥᒃ ᐊᑐᕈᓐᓇᑦᑎᐊᖅᑐᑦ ᐊᒻᒪᓗ ᑕᐃᒃᑯᐊ ᖃᕋᓴᐅᔭᕐᒥᒃ ᐊᑐᕈᓐᓇᑦᑎᐊᙱᓐᓂᖅᓴᑦ. ᑕᒪᓐᓇ ᑐᙵᕕᖃᓗᐊᓲᖅ ᐱᒃᑲᐅᓂᖏᑦ ᐱᒃᑲᐅᙱᓐᓂᖏᑦ ᑮᓇᐅᔾᔭᒃᓴᓂᖏᑕ ᐃᓄᐃᑦ, ᓱᑯᑦᑎᐊᓃᓐᓂᖏᑦ, ᐊᒻᒪᓗ ᐊᑐᕈᓐᓇᕐᓂᖏᑦ ᐊᑐᕋᒃᓴᐅᓲᖑᔪᓂᑦ. AI ᖃᕋᓴᐅᔭᒃᑯᑦ ᐃᓄᒃᑎᑑᖅᑑᔮᖅᑐᓂ ᐃᓱᒪᓲᖅ ᐱᒻᒪᕆᐅᕗᖅ ᐅᖃᐅᑕᐅᓗᓂ ᖃᕋᓴᐅᔭᖅᑎᒍᑦ ᐅᖃᓕᒫᕈᓐᓇᕐᓂᕐᒥᒃ.

ᐊᕐᕌᒍᑕᒫᑦ, ᐃᓕᒌᑦ ᐅᖃᓕᒫᕐᓂᕐᒧᑦ ᑲᓇᑕᒥ ᑲᑎᒪᑎᑦᑎᒍᓐᓇᓲᖅ ᐅᖃᐅᓯᖃᖁᔨᓪᓗᑎᑦ ᑲᓱᖅᓯᒪᓂᖏᑦ ᐅᖃᓕᒫᕈᓐᓇᕐᓂᖅ ᐊᒻᒪᓗ ᓴᒃᑯᐃᑎᑦᑎᓂᖃᕐᓗᓂ ᐊᑦᑐᐃᓂᖃᕋᔭᖅᑐᒥᒃ ᐃᓅᓯᑦᑎᓐᓂ. ᑕᒫᓂ ᐊᕐᕌᒍᒥ, ᐊᑦᑐᖅᑕᐅᓯᒪᔪᑦ ᐃᓕᓐᓂᐊᕐᓂᓕᕆᓂᕐᒧᑦ, ᑐᓴᐅᒪᖃᑎᒌᑦᑐᓕᕆᓂᕐᒥᒃ, ᐊᒻᒪᓗ ᖃᕋᓴᐅᔭᖅᑎᒍᑦ ᐃᓄᒃᑎᑑᔮᖅᑐᖅ ᐃᓱᒪᖃᓲᖅ ᓯᕗᒃᑲᖅᑕᕐᓂᐊᖅᑐᑦ ᐅᖃᐅᓯᖃᖅᑎᓪᓗᒋᑦ ᑕᒪᔅᓱᒥᖓ A I ᐊᓯᔾᔩᕙᓪᓕᐊᓂᖓ ᐊᒻᒪᓗ ᐅᖃᓕᒫᕆᐅᖅᓴᓂᖅ: ᐱᕕᖃᕈᑎᒋᔭᐅᕚ ᐅᕝᕙᓘᓐᓃᑦ ᐅᓗᕆᐊᓇᖅᑐᒨᖅᑎᑦᑎᒍᓐᓇᖅᐹ?

ᑕᒪᓐᓇ ᓇᐃᓈᖅᓯᒪᓂᖓᑕ ᐅᖃᖅᓯᒪᓂᖏᑦ ᖃᐅᔨᒃᑲᓐᓂᕈᓐᓂᕈᕕᒋᑦ, ᐅᖃᓕᒫᕆᐊᖁᕙᑦᑎᒍᑦ ᑕᒪᐃᓐᓂ ᐅᖃᐅᓯᕆᔭᐅᓂᐊᕐᓂᕐᒧᑦ ᑎᑎᕋᖅᑕᐅᓯᒪᔪᖅ ᖃᓪᓗᓈᑎᑑᖓᔪᖅ ᐅᕝᕙᓘᓐᓃᑦ ᐅᐃᕖᑎᑐᑦ−ᐊᒻᒪᓗ ᐊᑎᓕᐅᕐᓗᑎᑦ ᐃᓚᐅᖃᑕᐅᒐᔭᕋᕕᑦ ᑲᑎᒪᑎᑦᑎᓂᖃᖅᑎᓪᓗᑕ ᐅᖃᖃᑎᒋᔭᐅᒍᓐᓇᕋᔭᕋᕕᑦ ᑕᒪᒃᑯᐊ ᐱᓪᓗᒋᑦ!

Discussion paper in English

Le document de discussion en français

ᑭᓲᒻᒪᑦ AI?

AI ᖃᕋᓴᐅᔭᕐᒨᕋᒃᓴᐅᕗᖅ ᐊᑐᖅᑕᐅᔪᓐᓇᖅᑐᓂ ᐃᓄᖕᓄᑦ ᐃᓄᓪᓚᑦᑖᖅᑎᑐᑦ ᐃᓱᒪᙳᐊᕈᓐᓇᖅᑐᖅ. [1] AI ᖃᕋᓴᐅᔭᓕᕆᔾᔪᓰᑦ ᐱᓕᕆᐊᖃᕈᓐᓇᕐᒪᑕ ᐱᖃᓯᐅᑎᓪᓗᒋᑦ ᐊᑲᐅᙱᓕᐅᕈᑎᓂᒃ ᐋᖅᑭᒃᓱᐃᔪᓐᓇᖅᑐᓂ, ᐃᓱᒪᓕᐅᕐᓗᓂ, ᐊᒻᒪᓗ ᐱᔾᔪᑎᖃᕐᓗᓂ ᐱᐅᔪᓂᒃ ᐃᓱᒪᓕᐅᕈᓐᓇᖅᑐᓂ.[2] 2022−ᖑᑎᓪᓗᒍ, ᑭᒃᑯᑐᐃᓐᓇᕐᓄᑦ ᒪᑐᐃᖓᔪᖅ AI ᓴᖅᑮᑎᑦᑎᓚᐅᖅᓯᒪᕗᖅ ᓇᕿᑦᑕᕐᓗᓂ ᐅᖃᖃᑎᒋᔭᒃᓴᐅᓪᓗᓂ ᐅᖃᖃᑎᒋᔭᒃᓴᖅ ᖃᕋᓴᐅᔭᒃᑯᑦ, ᐅᖃᖃᑎᒋᔭᒃᓴᖅ ᓯᕗᓂᐊᒍᑦ ᐱᓕᒻᒪᒃᓴᖅᑕᐅᓯᒪᔪᖅ ᖃᕋᓴᐅᔭᒃᑰᖓᔪᖅ. ᓯᕗᓪᓕᖅᐹᑦᑎᐊᒥᒃ, ᖃᕋᓴᐅᔭᒃᑯᑦ ᓇᕿᑦᑕᕐᓗᓂ ᐅᖃᖃᑎᒋᔭᒃᓴᖅ.

AI ᖃᐅᑕᒫᑦ ᐃᓅᓯᑦᑎᓐᓂ ᐊᑐᖃᑦᑕᓕᕇᖅᑕᕗᑦ, ᐆᑦᑑᑏᑦ ᐅᑯᐊᖑᕗᑦ:

ᖃᕋᓴᐅᔭᒃᑯᑦ ᑎᑎᕋᕈᑎ ᐸᕝᕕᓴᒃᑕᐅᔭᐃᒃᑯᓯᖅᓯᒪᓗᒍ.
ᖃᕋᓴᐅᔭᕐᓅᖅᑕᐅᓲᑦ ᑭᓱᑐᐃᓐᓇᕐᓂᒃ ᐊᑐᕐᓗᓂ ᖄᖓᒍᒃᑲᓐᓃᕈᑏᑦ ᓲᕐᓗᒃ ᓄᓇᓯᐅᑎᒃᑯᑦ ᐅᓯᔭᐅᔾᔪᑎ ᐆᕗᕐ ᐅᕝᕙᓘᓐᓃᑦ ᓕᑉᑦ.
ᑎᑎᕋᑦᑎᐊᖅᑐᖃᕋᓗᐊᕐᒪᖔᖅ ᐱᑦᑎᐊᑎᑦᑎᒍᓂ ᖃᕋᓴᐅᔭᕐᒨᕆᐊᖃᓲᑦ ᓲᕐᓗᒃ ᒍᕌᒪᓕ ᐊᒻᒪᓗ ᕼᐃᐊᒥᖕᕙᐃ ᓇᑲᑎᕆᔾᔪᑎ.
ᑮᓇᕐᒥᒃ ᐃᓕᓴᖅᓯᒍᓐᓇᕈᑎ ᐅᖄᓚᐅᑎᕋᓛᕐᒥᒃ ᒪᑐᐃᖅᓯᔪᖃᕈᓐᓇᖁᓪᓗᒍ.
ᐅᓪᓗᖅᓯᐅᑎᓕᐅᕈᑏᑦ ᐊᒻᒪᓗ ᐅᐸᒃᑐᖃᕋᓗᐊᕐᒪᖔᖅ ᑎᑎᕋᕈᑎ ᖃᕋᓴᐅᔭᕐᓅᖅᑐᑦ.

ᐱᐅᔫᓂᖏᑦ ᐊᒻᒪᓗ ᐱᐅᙱᓐᓂᖏᑦ

ᐊᑐᖅᑕᐅᓲᖅ ᐃᖅᑲᓇᐃᔭᕐᕕᓂᑦ, ᐃᓕᓐᓂᐊᕐᕕᓂᑦ, ᐊᒻᒪᓗ ᐊᓯᖏᖕᓂᑦ ᐃᓅᓯᕐᒥᒃ ᐱᔭᕆᐊᑭᓪᓕᑎᑦᑎᒍᑕᐅᒐᓱᐊᓲᖑᓪᓗᓂ ᐊᑐᖅᑐᒧᑦ. ᐊᒥᓱᑦ ᓄᑖᑦ ᐊᑐᖅᑕᐅᒋᐊᙵᓕᖅᑐᖅᑎᑐᑦ, ᐅᕝᕙ ᐅᑯᐊ ᐊᐃᕙᐅᑎᒋᔭᐅᔪᑦ ᐊᑐᖅᑕᐅᖃᑦᑕᕐᓗᓂ ᐱᐅᔫᓂᖏᑦ ᐊᒻᒪᓗ ᐊᐃᕙᐅᑎᓖᑦ AI−ᒥᒃ, ᐱᖃᓯᐅᑎᓪᓗᒋᑦ:

ᐱᐅᔫᓂᖏᑦ:

ᑎᑎᕋᕆᐊᖃᓲᑦ ᐃᓗᓪᓕᖅᓱᖅᑕᐅᑲᐅᑎᒋᓗᑎᑦ (ᓲᕐᓗᒃ ᐆᑦᑑᑎᒋᓗᒋᑦ ᐅᓪᓗᖅᓯᐅᑎᒧᑦ, ᐅᐸᒃᐸᑦᑐᓄᑦ ᐃᖅᑲᓇᐃᔭᕐᕕᓄᑦ ᐃᓕᓐᓂᐊᕐᕕᒻᒧᓪᓘᓐᓃᑦ ᖃᐅᔨᓴᕈᑎᒋᔭᐅᓗᓂ).
ᐃᓕᓐᓂᐊᕐᕕᓂ, ᑐᑭᓯᒋᐊᕈᑏᑦ ᓄᐊᑕᐅᔪᓐᓇᖅᑐᑦ ᓇᓗᓇᐃᖅᑕᐅᖁᓪᓗᒋᑦ ᐃᓕᓐᓂᐊᖅᑏᑦ ᐃᑲᔪᖅᑕᐅᔭᕆᐊᓖᑦ.
ᐃᑲᔪᕐᓗᑎᑦ ᐃᓄᖕᓂᒃ ᐊᔪᕈᑎᓕᓐᓂᒃ (ᐆᑦᑑᑎᒋᓗᒋᑦ ᐅᖃᕈᓐᓇᑦᑎᐊᙱᑦᑐᓄᑦ ᓇᕿᑦᑕᖅᑕᐅᓯᒪᔪᑦ ᐅᖃᓕᒫᖅᑕᐅᓗᑎᑦ ᖃᕋᓴᐅᔭᕋᓛᒃᑯᑦ ᐅᖄᓚᐅᑎᕋᓛᒃᑯᓪᓘᓐᓃᑦ) ᒪᐃᑯᕈᓵᑉᑦ ᑐᑭᓕᐅᕆᔾᔪᑎ).
ᖃᕋᓴᐅᔭᒃᑯᑎᒍᑦ ᐃᓕᓐᓂᐊᖅᑐᓄᑦ ᐃᑲᔪᕈᑏᑦ ᐃᓕᓐᓂᐊᖅᑎᓄᑦ ᖃᓄᐃᓕᐅᖅᐸᓪᓕᐊᒍᓐᓇᕐᒪᖔᑕ ᐃᓕᑉᐹᓪᓕᖁᓪᓗᒋᑦ ᐃᑲᔫᑕᐅᔪᓐᓇᕐᒥᔪᖅ.

ᐱᐅᙱᓐᓂᖏᑦ:

ᖃᕋᓴᐅᔭᒃᑯᑦ ᖃᐅᔨᓴᐅᑎᖏᑎᒍᑦ ᖃᓄᐃᑦᑐᓂᑦ ᐊᑐᖃᑦᑕᓲᑦ ᓴᖅᑭᕐᕕᐅᓲᖑᓂᖏᑦ ᐊᑐᖁᔭᐅᓪᓗᑎᑦ ᖃᐅᔨᓵᖑᓲᓂᑦ ᐊᒻᒪᓗ ᐱᓕᕆᑦᑎᐊᕐᒪᖔᑦ ᖃᐅᔨᓴᐅᑎᖏᖕᓂᑦ ᐃᓱᒪᒋᔭᐅᙲᓐᓇᖅᑎᑦᑎᒍᓐᓇᖅᑐᑦ ᐃᓄᐃᑦ ᐊᑐᖅᓯᒪᔭᒥᓂᒃ (ᐆᑦᑑᑎᒋᓗᒍ, ᑎᑎᕋᕐᓗᓂ ᐊᓯᐊᓂᒃ ᐅᖃᐅᓯᕐᒥᒃ ᐊᑐᓲᕆᔭᕐᒥᒃ).
ᑲᙳᓇᖅᑐᓕᕆᓂᖅ ᐊᒻᒪᓗ ᐅᓗᕆᐊᓇᖅᑐᒨᖅᑕᐃᓕᒪᓂᖅ. ᐱᒻᒪᕆᐅᕗ ᖅᐊᑐᓲᑦ ᑐᑭᓯᒍᑎᑦ ᐊᑦᑐᐃᓂᖃᕐᓂᖏᑦ ᐅᓗᕆᐊᓇᖅᑐᒨᖅᑎᑦᑎᓲᑦ ᓯᖁᒥᑦᑎᓪᓗᑎᑦ ᐊᒻᒪᓗ ᐃᓄᐃᑦ ᑐᑭᓯᒋᐊᕈᑎᖏᑦ ᓄᐊᑕᐅᓲᖑᓂᖏᖕᓂᑦ AI ᐊᑐᖅᑕᐅᓕᕐᓂᕈᓂ ᑲᒻᐸᓂᐅᔪᓄᑦ.
ᖃᕋᓴᐅᔭᕐᒥᒃ ᑕᑎᖃᓗᐊᓕᕐᓂᖅ ᐃᒻᒥᓂᒃ ᐃᓱᒪᒃᓴᖅᓯᐅᕈᑎᖃᕈᓐᓃᖅᑎᑦᑎᒍᓐᓇᖅᑐᖅ ᐊᒻᒪᓗ ᐊᑲᐅᙱᓕᐅᕈᑎᓂᑦ ᐋᖅᑮᑎᑦᑎᑦᑕᐃᓕᒪᒍᓐᓇᐃᓪᓕᓕᕐᓗᓂ.
AI ᑐᙵᕕᓖᑦ ᐃᓕᓐᓂᐊᑎᑦᑎᒍᓰᑦ ᐱᓕᕆᖃᑎᒌᒋᐊᙵᐅᑎᑎᑦᑎᓂᖃᙱᑦᑐᑦ ᐊᒻᒪᓗ ᐃᓅᖃᑎᖃᕈᓐᓇᙱᑦᑐᑦ ᐊᑐᖅᑕᐅᔭᕆᐊᖃᓲᑦ ᐃᓕᓐᓂᐊᕐᓗᓂ.

ᐅᖃᐅᓯᖃᖁᓪᓗᒋᑦ ᐊᐱᖅᑯᑏᑦ

AI ᐱᔾᔪᑎᒋᔭᐅᓂᖓ ᐱᔭᕆᐊᑐᒻᒪᑦ ᐊᒻᒪᓗ ᐃᓱᒪᒃᓴᖅᓯᐅᕈᑕᐅᒋᐊᙵᓲᖑᓪᓗᓂ. ᐃᓚᐅᕝᕕᒋᑎᒍᑦ ᑲᑎᒪᓂᕐᒥᒃ ᑐᑭᓯᒋᐊᖅᑎᑦᑎᒐᓱᐊᖅᑎᑦᑎᔪᖅ ᑕᒪᔅᓱᒥᖓ ᐱᒻᒪᕆᐅᔪᒥᒃ ᐱᔾᔪᑎᒥᒃ. ᐃᓚᖏᑦ ᐊᐱᖅᑯᑏᑦ ᐊᑐᓲᖑᕗᑦ ᓲᕐᓗᒃ ᐅᖃᐅᓯᕆᔭᐅᒋᐊᙵᒻᒪᕆᓕᕐᓗᓂ ᐱᖃᓯᐅᔾᔨᕗᑦ:

ᖃᓄᖅ ᐊᑦᑐᐊᖃᑎᒌᓲᖑᕙᑦ ᐱᖅᑯᓯᑐᖃᖅᑎᒍᑦ ᐅᖃᓕᒫᕐᓂᖅ ᐊᒻᒪᓗ ᖃᕋᓴᐅᔭᒃᑯᑦ ᐃᓄᒃᑎᑑᔮᖅᑐᖅ ᐅᖃᓕᒫᖃᑦᑕᕐᓂᖅ?
ᖃᓄᖅ ᐊᑐᕈᓐᓇᖅᐱᑕ AI−ᒥᒃ ᐊᐅᓚᓂᖃᑦᑎᐊᖅᑐᒃᑯᑦ ᐊᒻᒪᓗ ᐱᑦᑎᐊᖅᑐᒃᑯᑦ?
ᖃᓄᖅ ᖃᐅᔨᒪᑦᑎᐊᑎᑦᑎᒍᓐᓇᖅᐱᑖ ᐅᖃᓕᒫᕈᓐᓇᑦᑎᐊᙱᑦᑐᓂᑦ ᕿᒪᒃᑕᐅᑐᐃᓐᓇᕐᓂᐊᙱᒻᒪᑕ AI ᖃᕋᓴᐅᔭᒃᑯᑦ ᐅᖃᓕᒫᖅᑎᑦᑎᒍᑎᓂᒃ ᐊᑐᖅᑐᖃᖅᐸᓪᓕᐊᓕᖅᑎᓪᓗᒍ?
AI ᖃᕋᓴᐅᔭᒃᑰᖅᑐᖅ ᐃᓄᒃᑎᑑᔮᖅᑐᖅ ᐃᓱᒪᖃᙳᐊᖅᑎᑕᐅᓯᒪᔪᖅ ᐃᑲᔪᓲᖅ ᐃᓕᓐᓂᐊᕐᓂᕐᒧᑦ ᓇᓕᒧᒌᙱᑦᑎᑦᑎᒍᑕᐅᓲᓂᑦ, ᐅᕝᕙᓘᓐᓃᑦ ᐊᕕᒃᓯᒪᐅᕐᓂᖏᑦ ᐃᓕᓐᓂᐊᕐᓂᖅ ᐅᖃᓕᒫᕆᐅᖅᓴᓂᕐᓗ ᐱᓂᖅᓴᕈᑐᐃᓐᓇᕐᓂᐊᖅᐹ?
ᑖᓐᓇ AI ᖃᕋᓴᐅᔭᒃᑰᖅᑐᖅ ᐃᓄᒃᑎᑑᔮᖅᑐᖅ ᐃᓱᒪᖃᙳᐊᖅᑎᑕᐅᓯᒪᔪᖅ ᐊᑐᖅᑕᐅᔪᓐᓇᖅᐹ ᐊᔭᐅᕆᓗᓂ ᓇᓕᒧᒌᓕᖅᑎᑦᑎᖁᔨᓂᕐᒥᒃ, ᐊᔾᔨᒌᙱᑦᑐᒡᒍᑏᑦ ᐱᓕᕆᓂᖅᓴᐅᓗᑎᑦ, ᐊᒻᒪᓗ ᐱᖃᓯᐅᔾᔨᓗᓂ ᑭᒃᑯᓕᒫᓂᑦ ᐊᑕᐅᑦᑎᕈᖅᑎᑦᑎᕙᓪᓕᐊᑐᐃᓐᓇᓕᖅᑎᓪᓗᒍ ᐃᓅᓯᕐᒥ ᐊᑐᓲᕗᑦ ᐅᓪᓗᒥᐅᓕᖅᑐᖅ?
ᑭᓲᕙ ᐊᔪᙱᓐᓂᕆᔭᐅᒥᐊᓲᑦ−ᓲᕐᓗᒃ ᐅᖃᓕᒫᕐᓂᖅ, ᑎᑎᕋᕐᓂᖅ, ᐊᒻᒪᓗ ᓈᓴᐅᓯᕆᓂᖅ−ᐊᑐᕆᐊᖃᖅᐱᑖ AI-ᒥᒃ ᐊᑑᑎᖃᑦᑎᐊᖅᑎᓪᓗᒍ?

ᑲᓇᑕᒥ ᐅᖃᖃᑎᒌᕝᕕᒃᓴᖅ—AI ᐊᓯᔾᔩᐸᓪᓕᐊᑎᑦᑎᓂᖓ ᐊᒻᒪᓗ ᐅᖃᓕᒫᕆᐅᖅᓴᓂᖅ: ᐱᕕᖃᕈᑎᒋᔭᐅᕚ ᐅᕝᕙᓘᓐᓃᑦ ᐅᓗᕆᐊᓇᖅᑐᒨᖅᑎᑦᑎᓂᖃᕋᔭᖅᐹ? — ᐅᓂᒃᑲᐅᑕᐅᒐᔭᖅᑐᖅ ᕿᑎᖅᑰᖅ, ᐊᒃᑑᕝᕙ 5, ᓯᕿᙳᔭᖅ 1:00 – 2:30 ᐅᓐᓄᓴᒃᑯᑦ ᐃᖃᓗᐃᑦ ᓯᕿᙳᔭᖓᑦ ᒪᓕᑦᑐᒍ ᖃᓪᓗᓇᐅᔭᕐᓗᑎᑦ ᐅᐃᕖᑎᑑᓕᖅᓱᖅᑕᐅᕙᓪᓕᐊᓗᓂ ᐃᕐᖐᓐᓇᖅ. ᐃᓚᐅᖃᑕᐅᕝᕕᒋᑎᒍᑦ. ᓇᕿᓪᓗᒍ ᐅᓇ ᐅᓪᓗᒥ ᐊᑎᓕᐅᖁᑕᐅᖁᓪᓗᑎᑦ ᑲᑎᒪᓂᕐᒧᑦ.

[1] ᓛᒃ, ᓯ (2022, ᑎᓰᕝᕙ 5). ᑭᓲᒻᒪᑦ AI ᖃᕋᓴᐅᔭᒃᑰᖅᑐᖅ ᐊᒻᒪᓗ ᐃᓇᖐᔪᓐᓇᖅᐹ ᐃᓄᖕᓂᒃ? ᒑᑎᐊᓐ ᐱᕙᓪᓕᐊᔪᓕᕆᔨᖏᑦ ᑕᑯᓂᐊᖅᑕᒥᓂᖅ ᐋᒡᒌᓯ 1, 2023 ᐅᕙᙵᑦ https://www.theguardian.com/technology/2022/dec/05/what-is-ai-chatbot-phenomenon-chatgpt-and-could-it-replace-humans.

[2] ᑯᕐᓯᐅᕋ. (2023, ᔪᓚᐃ 28) ᑭᓲᒻᒪᑦ ᖃᕋᓴᐅᔭᒃᑰᖅᑐᖅ ᐃᓄᒃᑎᑑᔮᖅᑐᖅ ᐃᓱᒪᖃᓲᖅ? ᑐᑭᖏᑦ, ᐊᑐᖅᑕᐅᖃᑦᑕᕐᓂᖏᑦ, ᐊᒻᒪᓗ ᖃᓄᐃᑦᑑᓂᖏᑦ. ᑯᕐᓯᐅᕋ. https://coursera.org/share/432ef4c66bd3ef9deeb67e42704ec4d0